جوانی ،حسن،غمزے،عہد،پیماں،قہقہے ،نغمے
رسیلے ہونٹ،شرمیلی نگاہیں ،مرمریںباہیں
یہاں ہر چیز بکتی ہے
خریدارو ! بتاو کیا خریدو گے؟
بھرے بازو ،گٹھیلے جسم،چوڑے آہنی سینے
بلکتے پیٹ،روتی غیرتیں،سہمی ہوئی آئیں
یہاں ہر چیز بکتی ہے
خریدارو ! بتاو کیا خریدو گے؟
زبانیں،دل،ارادے،فیصلے،جانبازیاں،نعرے
یہ آئے دن کے ہنگامے، یہ رنگا رنگ تقریریں
یہاں ہر چیز بکتی ہے
خریدارو ! بتاو کیا خریدو گے؟
صحافت،شاعری،تنقید،علم وفن،کتب خانے
قلم کے معجزے،فکر و نظر کی شوخ تحریریں
یہاں ہر چیز بکتی ہے
خریدارو ! بتاو کیا خریدو گے؟
اذانیں،سنکھ،حجرے،پاٹھ،شالے،داڑھیاں،قشقے
یہ لمبی لمبی تسبیحیں ِ،یہ موٹی موٹی مالائیں
یہاں ہر چیز بکتی ہے
خریدارو ! بتاو کیا خریدو گے؟
علی الاعلان ہوتے ہیں یہاںسودے ضمیروںکے
یہ وہ بازار ہے جس میں فرشتے آکے بک جائیں
یہاں ہر چیز بکتی ہے
خریدارو ! بتاو کیا خریدو گے؟
قتیل شفائی
0 comments:
Post a Comment