نعتِ رسولِ مقبولﷺ

کیوں ‘ آ کے رو رہا ہے ‘ آقا کے شہر میں
ہر درد کی دوا ہے ‘ آقا کے شہر میں

آﺅ گنہگارو ‘ چلو ‘ سر کے بل چلیں
بخشش کا دَر کھلا ہے ‘ آقا کے شہر میں

مانگے ‘ نہ بھیک مانگے ‘ یہ مرضی فقیر کی
بن مانگے مل رہا ہے ‘ آقا کے شہر میں

جھکتے ہیں سب ملائک ‘ کعبہ کے سامنے
کعبہ جھکا ہوا ہے ‘ آقا کے شہر میں

جنت کی آرزو نہیں مجھ کو ‘ میرے خدا
دو گز بڑی جگہ ہے ‘ آقا کے شہر میں

واصفؒ ‘ میرے لیے تو ‘ مدینہ ہے لامکاں
جنت کی اِنتہا ہے ‘ آقا کے شہر میں